Trump: Hamasi do të shfaroset nëse refuzon të heqë dorë nga kontrolli në Gaza

Presidenti Donald Trump paralajmëroi se Hamasi do të përballet me “zhdukje të plotë” nëse refuzon të heqë dorë nga kontrolli dhe pushteti që ka në Rripin e Gazas.

Në një mesazh për gazetarin e CNN, Jake Tapper, Trump u shpreh: “Shfarosje e plotë!”, kur u pyet për pasojat nëse Hamasi këmbëngul të qëndrojë në pushtet.

Tapper e ngacmoi më tej lidhur me përgjigjen e Hamasit ndaj një propozimi prej 20 pikash për armëpushim, duke cituar senatorin Lindsey Graham, sipas të cilit grupi e ka refuzuar planin duke insistuar për mosçarmatim dhe kontroll palestinez mbi Gazën.

“A është gabim?” pyeti Tapper. “Do ta zbulojmë. Vetëm koha do ta tregojë!!!” u përgjigj Trump teksa përpiqet të shtyjë përpara një plan të ri armëpushimi mes Izraelit dhe Hamasit.

Presidenti amerikan tha se është në pritje të një konfirmimi përfundimtar nga Hamasi, ndërsa Izraeli ka rënë dakord me vijën fillestare të tërheqjes të përcaktuar në planin e tij të propozuar për armëpushim.

Në një postim në Truth Social, Trump deklaroi: “Kur Hamasi ta konfirmojë, armëpushimi do të hyjë në fuqi MENJËHERË, do të fillojë shkëmbimi i pengjeve dhe i të burgosurve, dhe ne do të krijojmë kushtet për fazën tjetër të tërheqjes, e cila do të na çojë afër fundit të kësaj KATASTROFE 3,000-VJEÇARE”.

Ai shtoi se Izraeli ka ndalur përkohësisht sulmet ajrore në Gaza si një hap i rëndësishëm drejt finalizimit të marrëveshjes.

Megjithatë, CNN raportoi të shtunën se të paktën 67 persona humbën jetën në Gaza nga sulmet izraelite, sipas autoriteteve lokale shëndetësore.

Më herët, Trump kishte thënë se Hamasi i ishte përgjigjur pozitivisht planit të tij, duke e cilësuar zhvillimin si një “ditë të madhe” dhe “të pashembullt”.

LEXONI GJITHASHTU:

• Erdogan bisedë telefonike me Trump, në fokus situata në Gaza
• Raporti i OBSH: Më shumë se 10 mijë fëmijë në Gaza kanë mbetur të lënduar