Raporti OBSH: Gjysma e shqiptarëve me hipertension, vetëm 11% e mbajnë nën kontroll

Shqipëria është ndër vendet me prevalencë të lartë të hipertensionit në Europë. I cilësuar si vrasësi i heshtur, kjo sëmundje që karakterizohet nga rritja e qëndrueshme e tensionit të gjakut në arterie, që transportojnë gjakun nga zemra drejt të gjitha indeve dhe organeve të trupit, ka prekur thuajse gjysmën e popullisë shqiptare.

Raporti i fundit i OBSH ka nxjerrë në pah se 47% e shqiptarëve të moshës 30-79 vjeç vuajnë nga hipertensioni.

E përkthyer në shifra, 797 mijë persona në vendin tonë janë të prekur nga hipertensioni, por vetëm gjysma janë në dijeni për gjendjen e tyre.

Mungesa e simptomave bën që sëmundja të veprojë në fshehtësi derisa të shfaqen probleme serioze shëndetësore.

Ekspertët e OBSH japin alarmin se në Shqipëri vetëm 11% e të prekurve nga hipertensioni e mbajnë nën kontroll sëmundjen dhe marrin trajtim, ndërsa 711 000 persona me hipertension nuk e kanë gjendjen e tyre shëndetësore nën kontroll.

Ata bëjnë me dije se hipertensioni i pakontrolluar mund të bëhet shkak për infarkt, goditje në tru, sëmundje kronike të veshkave dhe demencë.

Shifrat e hipertensionit kanë ardhur në rritje në dekadën e fundit dhe trendi pritet të vijojë deri në 2030.

Mjekët fajësojnë si shkaktarë kryesorë të hipertensionit në popullatë konsumin mbi normë të kripës, alkoolit, duhanit, mungesën e aktivitetit fizik dhe obezitetin.