Plagoset kandidati i BDI-së në komunën e Likovës, u qëllua nga persona të armatosur

Bashkimi Demokratik për Integrim, BDI ka njoftuar sot se kandidati i tyre për listën në komunën e Likovës është sulmuar dhe plagosur nga persona të maskuar. BDI ka shprehur shqetësimin lidhur me sulmin e armatosur teksa ka dënuar aktin të cilin e ka cilësuar barbar.

BDI ka kërkuar që të ketë reagim të menjëhershëm dhe që autorët të dalin para drejtësisë. Gjithashtu BDI ka njoftuar se ditën e sotme ka pezulluar aktivitetin në shenjë solidarizimi. Fatmirësisht kandidati i BDI-së është jashtë rrezikut për jetën.

“Jemi të shqetësuar nga sulmi i armatosur ndaj kandidatit tonë dhe bartësit të listës në komunën e Likovës, i cili u qëllua nga persona me maska dhe u plagos. Fatmirësisht, jeta e tij është jashtë rrezikut dhe ai po merr kujdesin e nevojshëm mjekësor.

Ne dënojmë ashpër këtë akt barbar dhune dhe kërkojmë nga Ministria e Punëve të Brendshme dhe Prokuroria Publike të reagojnë menjëherë, me transparencë të plotë dhe me vendosmëri, për të identifikuar, arrestuar dhe sjellë para drejtësisë autorët e këtij atentati.

U bëjmë thirrje të gjithë mbështetësve tanë, simpatizantëve dhe qytetarëve në përgjithësi që të ruajnë qetësinë, të mos bien pre e provokimeve dhe të tregojnë maturinë që gjithmonë e ka karakterizuar lëvizjen tonë.

Në shenjë solidariteti me të plagosurin dhe për të theksuar seriozitetin e ngjarjes, partia jonë vendos të pezullojë aktivitetet e ditës sotme, ndërsa institucionet të ndërmarrin hapa konkretë për rikthimin e besimit publik dhe sigurisë në terren,” thuhet në reagim.