Flet Kushtetuesja për ngërçin në Kuvend: Grupi serb duhet të propozojë kandidatin

Gjykata Kushtetuese e Kosovës këtë të mërkurë ka publikuar aktgjykimin e plotë mbi ankesën e dorëzuar nga Lista Serbe lidhur me konstituimin e Kuvendit. Gjykata ka dhënë 12 ditë afat deputetëve që ta finalizojnë procesin, prej ditës së publikimit të plotë të vendimit.

Gjykata Kushtetuese konstaton se grupi më i madh nga komuniteti serb duhet të propozojë kandidatin për nënkryetar të Kuvendit të Kosovës nga radhët e këtij komuniteti.

“Gjykata nënvizon se propozimi për nënkryetar të Kuvendit nga radhët e deputetëve të komuniteteve që nuk janë shumicë, në rastin konkret, të komunitetit Serb, duhet që të bëhet nga shumica apo numri më i madh i deputetëve nga radhët e deputetëve të komunitetit Serb”, thuhet në aktgjykimin e plotë.

Lista Serbe duhet të propozojë kandidatin për nënkryetar të Kuvendit nga radhët e komunitetit serb. Gjykata gjithashtu thekson se votimi në pako mund të realizohet nëse ka dakordësim mes grupeve parlamentare apo deputetëve.

Gjykata vlerëson që një procedurë e tillë e votimit mbetet në vullnetin e deputetëve dhe grupeve parlamentare me kushtin që të realizohet zgjedhja e anëtarëve të Kryesisë së Kuvendit.

Përfaqësimi i komuniteteve që nuk janë shumicë në Kuvend përfshirë edhe në Kryesinë e Kuvendit është detyrim kushtetues. Nëse Kuvendi nuk arrin të zgjedhë nënkryetarin nga radhët e deputetëve të komunitetit Serb, Kryesia e saj do të ishte e paplotë dhe jokushtetuese. Në këtë kontekst, zgjedhja e nënkryetarit të Kuvendit
nga komuniteti Serb si anëtar i domosdoshëm i Kryesisë së Kuvendit, është parakusht për konstituimin e Kuvendit.