Panos Ruçi i jep fund grevës së urisë pas 23 ditësh, thirrje për tubim në Syntagma

Babai i Denis Ruçit i ka dhënë fund grevës së urisë pas 23 ditësh pasi kërkesat e tij u pranuan. Panos Ruçi gjatë grevës së urisë ka kërkuar zhvarrimin e djalit të tij i cili humbi jetën tragjikisht në aksidentin hekurudhor të Tempit në Greqi. Ai gjithashtu ka kërkua kryerjen e ekzaminimeve të specializuara dhe toksikologjike për të mësuar shkaqet që sollën vdekjen e djalit të tij 22-vjeçar.

Në deklaratat e tij para mediave, Ruçi falënderoi ata që e mbështetën, si dhe mjekët që u kujdesën për të. Ai theksoi gjithashtu se lufta do të vazhdojë deri në fund. Ai bëri thirrje gjithashtu për një tubim të mërkurën në sheshin Syntagma.

“Derisa të gjitha kërkesat e mia të marrin përgjigje, unë do të jem këtu”, tha ai.

Babai i Denisit kërkon të marrë përgjigje nëse djali i tij ka ndërruar jetë për shkak të lëndëve të cilat transportoheshin në trenat që u përplasën në vitin 2023. Akuzat lidhur me aksidentin  tragjik lidhen me dyshimet se në tren ka patur lëndë të papërshtatshme që po transportoheshin. Nëse hetimet e vërtetojnë këtë akuzë atëherë do sillte rrëzimin e qeverisë greke.

Tragjedia e Tempit ndodhi më 28 shkurt 2023 në Greqi, kur dy trena përplasën për shkak të një gabimi teknik dhe njerëzor në një seksion hekurudhor të ngushtë. Përplasja shkaktoi vdekjen e 57 personave dhe plagosjen e dhjetëra të tjerëve, një nga aksidentet hekurudhore më të rënda në historinë e Greqisë.