Ekskluzive/ Hasimja njofton live Berishën: Jam kandidat për Tiranën, më mbështesni

Dy prej emrave të përfolur si kandidatë të opozitës për Bashkinë e Tiranës, Ermal Hasimja dhe Florian Haçkaj, ishin të ftuar në një lidhje direkte në emisionin “Review” me gazetaren Greta Topjana.

Ekskluzivisht për Euronews Albania, Ermal Hasimja bëri të ditur se paraqet kandidaturën e tij për kryetar të Bashkisë së Tiranës.

Ai iu drejtua drejtpërdrejt Sali Berishës gjatë intervistës, duke e njoftuar publikisht se pranon të kandidojë sipas kritereve që kreu i PD-së përcaktoi këtë të shtunë.

Hasimja theksoi se kërkon mbështetjen e Berishës dhe të partive opozitare, duke paraqitur emrin e tij si një kandidat i pavarur dhe përbashkues për opozitën.

“Me duket pozicioni logjik është që një opozitë e bashkuar të dalë me një kandidat të pavarur, i cili do të mbështetet nga një shumicë sa më e madhe e partive opozitare. Berisha ka kërkuar që edhe kandidatët e tjerë të shprehin dëshirat dhe ambiciet e tyre. Duke pasur këtë mundësi, unë po i drejtohem zotit Berisha dhe kryesisë së PD-së, si dhe forcave të tjera opozitare, duke ju paraqitur publikisht kandidaturën time për kreun e Bashkisë së Tiranës, me të njëjtat kritere që ai ka përcaktuar: kandidat i pavarur, pa logo specifike partie, i mbështetur nga shumica e opozitës. Prandaj, zoti Berisha mund ta quajë kandidaturën time të paraqitur dhe ta shqyrtojë”, tha Hasimja.

LEXONI GJITHASHTU:

• Profili i Ermal Hasimjas, shpalli live kandidaturën për garën në Bashkinë e Tiranës
• Kryesia e PD vendim për zgjedhjet, Berisha: Do të mbështesim kandidatët e pavarur
• Berisha komenton Çepanin, Hasimjan dhe Hackajn: Kandidatin mund ta kemi brenda javës