Mungesa e shqipes në uniforma, analisti: Mickovski po zbaton politika anti-shqiptare

Në një lidhje të drejtpërdrejtë për Euronews Albania nga Podgorica, analisti Sefer Selimi komentoi zhvillimet e fundit në Maqedoninë e Veriut, duke shprehur shqetësime të thella për politikat që, sipas tij, dëmtojnë të drejtat dhe arritjet politike dhe juridike të shqiptarëve në këtë shtet.

I pyetur nga moderatorja Esmeralda Mulaj mbi çështjen e uniformave që pritet të jenë vetëm në gjuhën maqedonase, Selimi u shpreh se kjo masë është pjesë e një procesi të qëllimshëm të “dekonstruimit dhe shpërbërjes” së të gjitha arritjeve të shqiptarëve në Maqedoninë e Veriut.

Ai theksoi se kjo nuk është rastësi apo gabim teknik, por një politikë e mirëmenduar dhe e planifikuar.

“Çfarë është më shqetësuese, është heshtja e plotë e partive politike shqiptare, të cilat pretendojnë se përfaqësojnë komunitetin, por nuk reagojnë ndaj këtyre zhvillimeve,” u shpreh Selimi. Ai shtoi se qeveria e udhëhequr nga Mickovski, e cila ka ardhur në pushtet duke përdorur një retorikë nacionaliste dhe anti-shqiptare, po implementon politika që minojnë interesat e shqiptarëve në Maqedoninë e Veriut.

Selimi theksoi gjithashtu se disa institucione po ndryshojnë vulat dhe tabelat rrugore në mënyrë të jashtëligjshme në zona ku shqiptarët përbëjnë pothuajse 100% të popullsisë, duke e cilësuar këtë si një politikë të qëllimshme dhe të mirëorganizuar, pjesë e fushatës zgjedhore për vitin 2024.

“Ne po shohim një partner shqiptar në qeveri që ka hyrë pa fituar legjitimitetin e shqiptarëve dhe pa marrëveshje të qarta mbi parimet dhe politikat që do të udhëhiqen. Tani po paguajmë çmimin e kësaj dëshire për pushtet të këtij formacioni politik,” përfundoi analisti.

LEXONI GJITHASHTU:

• Asnjë shqiptar në listë, Maqedonia e Veriut shpërblen me pension disa sportistë
• Partia e Arben Taravarit braktis qeverinë e Maqedonisë së Veriut